2019/06/11
எதிர் மறை எண்ணங்கள்
கையில் அழகான ரோசா!
இருந்தாலும்
காயம் தந்த முள்ளையும்
ஓரப் பார்வையில் விழுத்தி விடுகிறது மனம்
இவ்வாறே வாழ்க்கையும் எப்போதும் எதிர்மறை எண்ணங்களின் ஆக்கிரமிப்பில் அலை மோதுகிறது.
- Jancy Caffoor-
11.06.2019
யதார்த்தம்
இந்த உலகம் எப்போது உருவாக்கப்பட்டதோ, அன்றே மனித வர்க்கமும் சுயநலம் என்ற வலையை தன்னைச் சுற்றி பின்னத் தொடங்கி விட்டது। வஞ்சகம், பொறாமை, கள்ளம், கபடம் போன்ற நச்சு விதைகளின் இருப்பிடம் அவனது மனமாக மாறி விட்டது। தான், தன் குடும்பம் முதனிலை பெற, அடுத்தவர் தூரமாகினர். ஒவ்வொரு மனிதர்களுக்குள்ளும் பொதுநலம் மறைந்து போனதில் முரண்பாடுகளின் விளைச்சல் அவனது வார்த்தைகள் மூலமாக உருவாகத் தொடங்கிவிட்டது. அழகான குறுகிய கால வாழ்க்கையில் சந்தோசம் துளியளவு கிடைக்காத மன நிலை நிரந்தர சொத்தாக மாறி விட்டது! உள்ளே குமுறி வெளியே சிரிக்கும் நடிகனாக மனிதன் மாறத் தொடங்கி விட்டான். இயந்திரமயமான இவ் உலகம் இன்று இதயம் இல்லாத மனிதன் கையில்!
- Jancy Caffoor-
11.06.2019
2019/06/05
Sahrish
தினமும்
குறும்பை பிழிந்து ஊற்றுகிறாள்
இருளில் - என்
தனிமைக்குள் தன் சிரிப்பை உதிர்த்தே
வண்ணக் கலவையாகிறாள்
என்னுள்!
தன் மலர்க்கரம் வலை வீசி
என் தோளில் மாலையாகின்றாள்
அன்பு வாசம் தூவி - என்
அன்புத் தூணில் சாய்கிறாள்!
முல்லை பற்கள் உதிர்ந்த
ஏழு எட்டாத அழகு நிலவவள்!
கலகலவென கதை பேசி
காற்றுக்கும் சுவாசம் வீ சுவாள்!
சிறகடிக்கும் சின்ன சிட்டு - என்
உறவுக்கு உயிர் தந்த லட்டு !
அவள் சின்ன குறும்பு சஹ்ரிஸ் !
.
- Jancy Caffoor-
05.06.2019
நன்றி பகிர்வு
தீ ஜுவாலை அனலுக்கு மத்தியிலும் அல்ஹம்துலில்லாஹ்......!
அழகான பெருநாள் மலர்ந்துள்ளது. இருந்தும் வாப்பா எம்மை நீ விட்டு நீங்கி மூன்று வருடங்கள்! கண்கள் கருக்கட்டுகின்றது கண்ணீரைப் பிசைந்து
பிரிவு நீளும் போதுதான் நினைவுகளும் ஆழமாக ஊடுறுவி நிற்கின்றது போலும். மனதில் வாப்பாவும் பெருநாள் ஞாபகங்களினூடாக இன்றும் பயணிக்கின்றார் என்னோடு!
பெருநாளை உயிர்ப்பிக்கும் அன்புள்ளங்களின் வாழ்த்துக்கள் இன்றும் என் மனதில் ஈரம் சேர்க்கின்றது. இந்த வருடம் என் பள்ளி நட்புக்களின் தோழமை வாழ்த்துக்களையும் சுமந்து பயணிக்கின்றேன். வாழ்த்து வாசத்தினூடு அன்பு பகிர்ந்த அனைவருக்கும் நன்றிகள்.
- Jancy Caffoor-
06.04.2019
Subscribe to:
Posts (Atom)