இப்படித்தான் வாழ வேண்டுமென எல்லோருக்கும் எதிர்பார்ப்புக்களும், ஆசைகளும் இருக்கும். ஆனால் எதிர்பாராத சூழ்நிலைகள் நம்மை திசை திருப்பி விடுகின்றபோது நிலைகுலைந்து போய் விடுகின்றோம்.
பிரச்சினைகள் சூழ்கையில் ஏன் பிறந்தோமென்ற தவிப்பிலும், விரக்தியிலும் மூழ்கி, நகர்கின்ற ஒவ்வொரு நாட்களும் நரக நெருப்பில் நிற்பதாக உணர்வோம். ஆனாலும் பிரச்சினைகள் நம்மைச் சூழும்போதுதான் சிந்திக்கின்றோம். அதற்குள் உருவாகின்ற புதிய பாதைகளைக் கண்டறிகின்றோம்.
ஜன்ஸி கபூர் - 30.04.2021
நம் சந்தோசம் நம் வசமே. நமது இயல்பான நடத்தைகளிலேயே அது தங்கியுள்ளது. ஆனாலும் கிடைக்கின்ற சொற்ப சந்தோசங்களையும் அடுத்தவர்கள் என்ன நினைப்பார்களோ எனும் வட்டத்தினுள் நம்மைச் சுழற்றி அடுத்தவர்களுக்காகவே நம்மை நம்மிடமே விட்டுக் கொடுத்து மனதின் நிம்மதியை இழந்து விடுகின்றோம்.
ஜன்ஸி கபூர்
இறைவனால் படைக்கப்பட்டிருக்கின்ற உலகம் இயற்கையால் சூழப்பட்டிருக்கின்றது. மண்ணில் வீழ்கின்ற வித்துக்கள் மறு விநாடியே மரம் ஆவதில்லை. கருவுக்குள் உருவாகின்ற உயிர்கள் இவ்வுலகைக் காண பத்து மாதங்கள் வரை காத்திருக்க வேண்டும். பருவ மாற்றங்களோ, காலநிலையோ படிமுறைச் சுழற்சிக்கமைவாக செயற்படுகின்றன.
'மனிதன் பெரிதும் அவசரக்காரனாக இருக்கின்றான்' (17:11)
என்ற திருக்குர் ஆனின் கூற்று எவ்வளவு உண்மை என்பதை நாம் புரிந்துகொள்ளலாம்.
ஆனால் இந்த நவீன உலகத்தில் வாழ்கின்ற மனிதர்களின் செயல்களில் காட்டப்படுகின்ற அவசரம் எனும் மாயையின் விளைவாக பல எதிர்பாரத விளைவுகள் நம்மை ஆட்கொள்கின்றன.
நிதானமே பிரதானம் என்பார்கள். ஆனால் பொறுமை இழக்கப்படும்போது நிதானமும் காணாமற் போய்விடுகின்றது.
ஏன் அவசரப்படுகின்றோம்?
எதற்கு அவசரப்படுகின்றோம்?
சிந்திக்கின்றோமா .....
நினைத்தவுடன் கிடைக்க வேண்டுமென்ற அவசரப் பண்பால் நமது அவசியமான சிந்தனைகள் செயலிழந்து போய் விடுகின்றன.
பல சந்தர்ப்பங்களில் நாம் எடுக்கின்ற அவசர தீர்மானங்கள், முடிவுகள் என்பன நமது இயல்பான வாழ்வையே திசை திருப்பி விடக் கூடியன.
தற்கொலை செய்வதும் அவசர உணர்வுக் கோளாறே!
விபத்தும்கூட அவசர வேகத்தின் வேதனைப் பக்கமே!!
அவசர வார்த்தைப் பிரயோகங்கள் நம் பெறுமதியான ஆளுமையையே கேலிப்படுத்தி விடும். மன உணர்வுகளை சினம் ஆட்கொள்ளும்போது ஏற்படுகின்ற வார்த்தைப் பிரயோகத்தை அவசரமாக வெளியேற்றும்போது பிறரின் பகைமையும், குரோதங்களும் நமக்குச் சொந்தமாகின்றன.
தோல்வியில் முடிகின்ற சில காதல்கள்கூட அவரமாக எழுகின்ற எதிர்பால் கவர்ச்சியே....
அவசர அவசரமாக கொறித்து உண்பதைப் போல் ஆகாரமெடுக்கின்ற இன்றைய பலருக்கு ஆரோக்கியமும் கெட்டே போய்விடுகின்றது.
நாம் அவசரப்படும்போது பதற்றம் நம்மை அணுகுகின்றது. எதிலும் திருப்தியற்றுப் போகின்றோம். நம் நம்பிக்கை பொய்த்து விடுகின்றது. ஈற்றில் செய்யப்படுகின்ற வேலைகள் செல்லக் காசாகி விடுகின்றன.
திட்டமிடலுடன் கூடிய தீர்மானம் நமக்குள் இருந்தால் நாம் எதற்கும் அவசரப்படமாட்டோம்.
எனவே அவசியமான வாழ்வில் அவசரம் தவிர்த்து வாழ்வோம்
ஜன்ஸி கபூர் - 26.04.2021
சாதனையாளர்களின் சரித்திரப் பக்கங்களை வாசிக்கையில் எந்தவொரு சாதனைகளும் இலேசில் கிடைப்பதில்லையெனத் தோன்றும். அந்த வெற்றியாளனின் வாழ்க்கைக்குள் இருக்கின்ற கடினமான உழைப்பு நம் கண்களுக்குள் தெரியும். மானசீகமாக உழைக்கின்ற ஒவ்வொரு செயலுக்கும் வெற்றியைத் தேடுகின்ற நம்பிக்கை இருக்குமாயின் கிடைக்கின்ற ஒவ்வொரு சிறு வெற்றிகளுமே நமது வாழ்வையே மாற்றியமைக்கின்ற சக்திகளாக மாறி விடுகின்றன.
உயரப் பறக்கின்ற பறவையின் முதல் அடி கூட மெல்லிய தத்தித் தத்திப் பறப்பதற்கான முயற்சிதான். நம்பிக்கையுடனான அந்தப் பயிற்சிதான் நீண்ட வானில் சுதந்திரமான உலாவுகைக்கான உத்வேகமாக மாறுகின்றது. நாமும் சாதனையாளர்களாக மாறுவோம்.
ஜன்ஸி கபூர் - 26.04.2021
ஒவ்வொரு விடியலும் எல்லோருக்கும் நம்பிக்கைக்கான ஒளி விளக்குதான். மனதிலே தேங்கிக் கிடக்கின்ற நிறைவேறாத எதிர்பார்ப்புக்கள் இன்றாவது நிறைவேறுமென மீள எதிர்பார்த்து காத்திருக்க வைக்கின்றது. நினைத்த எண்ணங்கள் மீள ஏமாற்றமாகி சோர்ந்து விழுகையில் நாளைய விடியலாவது விடை தருமென மீள மனதில் புதிய நம்பிக்கையுடன் வாழ்தல் தோல்வியை வாழ்விலிருந்து நகர்த்தி விடுகின்றது.
இலவசமாகக் கிடைக்கின்ற கற்பனைகளுக்கும், எதிர்பார்ப்புகளுக்கும் காலம் இலேசில் பதில் தருவதில்லை. சோர்வான மனங்கள் சோபை இழக்கையில் விரக்தி நம்மைச் சூழ்ந்து விடுகின்றது. எனவே கிடைக்கின்ற தோல்விகளை உதிர்க்கின்ற வரையில் நம்பிக்கையுடன் வாழ்வோம்.
Jancy Caffoor - 25.4.2021
இயலாமை என்பது தோற்றுப் போகின்ற வாழ்விற்கான அடையாளம்தான். நம்மிடையே காணப்படுகின்ற பலகீனங்களை கண்டறிந்து, அவற்றை பலமாக்க முயற்சி செய்யாதவரை இயலாமையும் நம்மை மோப்பம் பிடித்துக் கொண்டே இருக்கும்.
இயலும் எனும் மந்திரச் சொல்லால் போராட்ட வாழ்வில்கூட, மகிழ்வின் வாசம் வீசிக் கொண்டேயிருக்கும். நமது பாதையில் குறுக்காகிக் காணப்படுகின்ற தடைகளைப் பார்த்து தயங்கி நிற்கின்ற இயலாமையை கசக்கி வீசியெறிந்து விட்டு தடைகளைத் தகர்க்கின்ற வழிகளைக் கண்டறிதல் வெற்றியின் பக்கத்தில் நம்மை நிறுத்தும்.
ஜன்ஸி கபூர் - 24.04.2021
அழகான பட்டாம்பூச்சியொன்று சில நாட்களாக அந்தப் பூக்களைச் சுற்றி சுற்றி வருகின்றது. காற்றோடு உரசுகின்ற அதன் சிறகுகள் அமுதத்தின் போதை நினைப்பில் ஆசையுடன் உராய்கின்றன.
நாட்கள் செல்லச் செல்ல ஈர்க்கப்பட்ட புற அழகின் கவர்ச்சி படிப்படியாகக் குறைய,
ஒரு நாள் அந்த மலரின் பார்வையிலிருந்து நீங்கி விட்டது அந்தப் பூச்சியும்.....
அந்தப் பூச்சிதான் மனதோ.....
வாழ்க்கையில் எதுவும், எந்த உணர்ச்சியும் யாருக்கும் நிரந்தரமில்லை. இயல்பான வாழ்வில் மனம் போராடும்போது, புற மாயைகளிலிருந்து நீங்கி விடுகின்றது. ஆசையும், அதிசயமும் கலவையாகி ஜொலித்த ஒவ்வொன்றும் அந்நியமாகி விடுகின்றன.
இதைத்தான் இரசித்தோமா
ஆச்சரியம் நம்மை விழுங்கி விடுகின்றது.
மனதில் ஊற்றெடுத்த ஆசைகள் மங்கிப் போக, மறுதலையாக ஏமாற்றமும் அலுப்பும் ஒன்றன்பின் ஒன்றாக நம்மைத் துரத்த ஆரம்பிக்கின்றன.
ஒரு குறித்த காலத்தின் பின்னர் நாம் ஆசைப்பட்ட விடயங்களை அசை போட்டுப் பார்ப்போமாயின், அவை சாதாரண விடயங்கள்போல் நம்மை விட்டுக் கடந்து போயிருக்கும். நம்மைப் பற்றிய சுய விசாரணையின்போது அட இதற்குத்தான் இப்படி முக்கியத்துவம் கொடுத்தோமா என நம்மையே நாம் திருப்பிக் கேட்போம். ஏனெனில் அன்பைத் தவிர அனைத்துமே காலவோட்டத்தில் காணாமல் போய்விடுகின்றன.
சிறு புள்ளிதான் ஒவ்வொரு தொடக்கத்திற்கும் ஆரம்பம். அது சிதைவதும், சீராகுவதும் நமது மனோபலம், முயற்சி, விருப்பில் தங்கியுள்ளது. செய்கின்ற ஒவ்வொரு செயலுக்கும் அர்ப்பணிப்பான தொடக்கமொன்று இருக்குமாயின், அச்செயலின் வெற்றிக்குள் நமது நிழலும் மகிழ்ந்து கொண்டிருக்கும்.
ஜன்ஸி கபூர்
வாழ்க்கை என்பது எதிர்பார்ப்புக்களின் தொகுப்பு. நிதர்சனத்திற்கும் கற்பனைக்கும் இடையிலான தொங்கு பாலமாகவே காணப்படுகின்றது. ஒவ்வொரு விடியலும் விரிக்கின்ற ஆசைகள் சில நிறைவேற பல மறைந்து விடுகின்றன. இன்றைய இழப்புக்களை நாளைய நம்பிக்கைகள் நிறைவேற்றும் எனக் காத்திருந்து காத்திருந்து பல காலாவதியாகி விடுகின்றன. ஆனாலும் அடிமனதில் யாரும் அறிந்திராமல் படிந்திருக்கின்ற ஏமாற்றங்களும் வலியின் சுவடுகளும் நம்மைக் கடந்து செல்லும் நொடிகளை கசக்கி விடுகின்றன. வசந்தத்தை எதிர்பார்க்கின்ற வாழ்வியல் எதிர்பாராத மாற்றங்களால் தன் சோபையை இழந்து விடுகின்றது என்பதே யதார்த்தமாகும்.
ஜன்ஸி கபூர் - 21.04.2021
