2014/07/26
எண்ணங்கள்
பிள்ளைக்கு குறும்பு கரும்பு - நமக்கோ
அது தொல்லை தரும் எறும்பு!
----------------------------------------------------------------------------------
2014/07/25
எல்லாமே முடிந்து விட்டதாய்
எல்லாமே முடிந்து போனதாய்
நெஞ்சக்குழியில் விரக்தி!
கவிதை வடிக்கத் தொடங்குகின்றேன்
காகிதம் நனைகின்றதா
கண்ணீர்த்துளிகளின் அட்டகாச யாத்திரையால்!
உன் னுருவில் கண்ட அன்பு
உரு சிதைந்ததாய் பிரமை!
உனக்காய் நானும்
எனக்காய் நீயும் அழுத நாட்கள்
தனிமைக் கசிவில்
ஞாபகங்களாய் வழிகின்றன!
தூக்கத்தைத் தொலைத்துவிட்டு
ஏக்கத்தை நிறைத்து
விடிவிளக்காய்
நிறைந்த நம் ஞாபகங்கள்
இன்னும் நீளமாய் -நம்
சுவடேந்தி அலைகின்றன!
ஓ
பிரிந்து விட்டாயா!
என் கல்லறைச்சுவர்களில்
சிறகுடைந்த பட்டாம்பூச்சிகள்
காவலிருக்கின்றன
இற்றுப்போன என் வெற்றுடம்பின்
வலியைத் தூதுரைக்க
உனக்கு!
- Jancy Caffoor-
25.07.2014
முகநூல் எண்ணங்கள் - 7
நம் மௌனத்தின்போதும் ஒருவரால் நம் அன்பைப் புரிந்து கொள்ளக்கூடியதாக இருந்தால், அவரின் உண்மையான அன்பு நமக்குச் சொத்தாகக் கிடைத்துள்ளது என்பது அர்த்தம்....
-------------------------------------------------------------------------
நீ எனும் ஒற்றைச் சொல்......என்
வாழ்வின் முற்றுப்புள்ளி!
---------------------------------------------------------------------------
சுயநலம் அதிகமாகும்போது சூழ்ந்திருக்கும் அன்பர்களும் தொலைந்து போகின்றார்கள்!
--------------------------------------------------------------------------
ஒரு மனிதர் அணியும் பதவி, அந்தஸ்து, அவசர முடிவுகள் எனும் முகமூடிகளால் இழக்கப்படுவது என்னவோ நிம்மதிதான்!
சுகங்கள் பரிமாற ஆயிரம் பேர் காத்திருக்கலாம்
ஆனால்.....
சோகங்கள் பரிமாறும் அனைத்து அன்புள்ளங்களும் நமக்குக் கிடைக்கும் இன்னுமொரு தாய்மடியே!
--------------------------------------------------------------------------
எந்த ஒரு காரியம் அல்லது செயலைச் செய்யும்படி அடுத்தவர் நம்மைப் பணிக்கும்போது உடனே நமக்குள் மனக்குழப்பம் ஏற்படும்.
"இதனை நம்மால் செய்ய இயலுமா"
மலைப்பு மறுப்பாக மாறிவிடும்.
ஆனால்...............
சில நிமிடங்களின் பின்னர் , நமக்கு நாமே சமாதானமாகி 'கிடைத்த வாய்ப்புக்களை'ச் சவால்களாகக் கருதி செயற்படத் தொடங்கி விடுவோம். எந்தச் செயலாக இருந்தாலும்,
"முடியும்"
எனும் தன்னம்பிக்கை போதும். அவை வெற்றியின் அறுவடைகளை நமக்கு அள்ளித் தரும்.
-------------------------------------------------------------------------
தாயின் கருவறை முதல் கல்விச்சாலை...
கற்றலின் அனுபவ கூடம் வாழ்க்கைச்சாலை!
ஏடு மட்டும் கற்றவன் தோற்றுப் போகின்றான்...
வாழ்வைக் கற்பவன் அடுத்தவனுக்குப் பாடமாகின்றான்!
Subscribe to:
Posts (Atom)