நட்சத்திர கீறல்கள்
வீழ்ந்தன புன்னகையாய்!
புல் நுனி கழுவும் பனியோ
தள்ளாடி வீழ்ந்தன கன்னவோரம்!
வியர்வையின் ஈர வீரியம் கண்டு
அயர்ந்தன மேனி யிதழ்கள் துவண்டு!
வானவில்லின் சாயம் கரைந்து
வழிந்தது இடை நெருக்கும் மெல்லாடையாய் !
நறுமணம் பூசும் தென்றல் கெஞ்சும்
சுவாசம் கொஞ்சிப் பேச!
இமையோரம் வெட்கிக் குனியும்
விழியின் சிறகடிப்பின் மோகம் கண்டு!
விரல் வருடும் ரேகை கழன்று
வரிகள் வரையும் உனை நினைந்து!
காதல் தேவதை யுனக்காய் என் தேசம்
காத்திருக்கும் ஏக்கங்கள் பல சூடி!
