காலத்தை வென்ற கணினி

'எண்ணும், எழுத்தும் கண்ணெணத் தகும்' என்பார்கள். எமது இன்றைய வாழ்வின் பிரதான அறிவுக் கண்ணாக கணினி விளங்குகின்றது. தகவல் தொழினுட்ப அறிவும் ஆற்றலும் நம் முன்னே விரித்து வைத்திருக்கின்ற சவால்களை நாம் வென்றெடுக்க கணினி இயக்கத்திற்கான அறிவும், அனுபவமும் தேவைப்படுகின்றது. கணினி அறிவற்றவர்களை இவ் அறிவியல் உலகம் நிராகரித்து விடுகின்றது என்றால் அது மிகையில்லை.

1642 ஆம் ஆண்டு பிளெஸ் பாஸ்கால் என்பவரால் சிறிய சிறிய எண்களைக் கூட்டுவதற்காக கண்டுபிடிக்கப்பட்ட கூட்டல் பொறியும், பின்னர் கொற்பிறீட் லைப்நிற்ஸ் வடிவமைத்த கல்குலேற்றரும், சாள்ஸ் பபேஜ் என்பவரால் கண்டுபிடிக்கப்பட்ட கருவியும் பல்வேறு சிந்தனைகளின் விரிகையினால் இன்றைய கணினி எனும் இயந்திரப் பொறியின் உருவாக்கத்திற்கு தளம் அமைத்துத் தந்துள்ளன.

கற்களை உராசி தீமூட்டி வாழப் பழகிய மனிதன், சொற்களை காற்றலைகளில் ஒலிகளாக்கி உலாவிட்ட மனிதன், எழுத்துக்களால் காகிதங்களை அலங்கரித்து வாழப் பழகிய மனிதன், இன்று தன் சிந்தனையால் அறிவைப் புரட்சி செய்ததன் பலனாக கணினி யுகத்தில் தம் சுவடுகளைப் பதித்துள்ளான்.

அன்றைய காலகட்டத்தில் விரல்களின் மொழியாக பேனாக்கள் காணப்பட்டன. ஆனால் இன்றோ விரல்களின் அசைவுகள் கணினி விசைப் பலகைகளுடனல்லவா ஒன்றித்து நிற்கின்றன. தொழினுட்ப வளர்ச்சியின் மூலப் புள்ளியாக இக்கணினியே காணப்படுகின்றது.

வணிகம், அறிவியல் தொழினுட்பம், தொலைத் தொடர்பு, கல்வி, மருத்துவம், விண்வெளி, பாதுகாப்பு, விளையாட்டு, பொறியியல், வங்கி உள்ளிட்ட கணக்குத் துறை, பொழுதுபோக்கு போன்ற சகல துறைகளிலும் கணினி தனது சுவடுகளைப் பதித்துள்ளது.

பாடசாலைகளில் தகவல் தொழினுட்ப அறிவினைப் பாடங்களினூடாகப் புகுத்தி கற்பிக்க ஒவ்வொரு நாட்டு அரசும் தனது வரவு, செலவு திட்டத்தில் பல கோடி ரூபாக்களை ஒதுக்குகின்றது. எதிர்கால கல்விப் புலத்தின் சுவடாக இக்கணனியே காணப்படப் போகிறது. தற்போது நாம் எதிர்கொண்டுள்ள கொவிட் 19 நோய் நிலைமைகளின்போது மாணவர்கள் வீடுகளில் இருந்தே கற்க நிகழ்நிலைக் கற்றல் கற்பித்தலை வழங்க இக்கணனியே உதவுகின்றது.

இன்றைய நவீன காலத்தில் கணினி உலகத்தையே சுருக்கி விட்டது எனலாம். உலகின் பல மூலைகளிலும் உள்ள மக்களை மின்னஞ்சல், இணையங்களினூடாக இக்கணினி சில விநாடிகளிலேயே இணைத்து விடுகின்றது. முகம் பார்த்து உரையாடவும், தமக்குத் தேவையான தகவல்களைப் பரிமாறிக் கொள்ளவும் இலகுவான பாதையாக மிளிர்கின்றது.

தொழினுட்ப சவால் நிறைந்த இவ்வுலக இன்றைய வாழ்வில் மனிதன் தன்னைப் பாதுகாக்கப் போராட வேண்டியுள்ளது. இந்நிலையில் தன் வீட்டைச் சூழ்ந்த நிகழ்வுகளைக் கண்காணிக்க கண்காணிப்பு கருவிகளைப் பொருத்தி அவற்றின் நிகழ்வுகளைக் கண்டறியவும் கணனி தேவைப்படுகின்றது.

உடலிலுள்ள நோய்கள் மற்றும் குறைகளைக் கண்டறியவும், அவற்றுக்கான சிகிச்சைகளைச் செய்யவும் கணனி உற்ற தோழனாக நமக்கு விளங்குகின்றது.

இவ்வாறாகவே அலுவலகப் பணிகளான நிர்வாக விடயங்கள், வரவு, செலவு போன்ற கணக்கு விடயங்களைக் கையாளவும், கணனி அறிவு பயன்படுத்தப்படுகின்றது. தகவல்களைத் திரட்ட சேமிக்க, பரிமாறிக் கொள்ளவென பல்துறைப் பரிமாணங் கொண்டு இக்கணனி பயன்படுகின்றது.

'கண்டதைக் கற்கப் பண்டிதனாவான் ' என்பார்கள். வாசிக்கின்ற நூலறிவின் ஆர்வம் குறைந்திருக்கின்ற இன்றைய காலகட்டத்தில் இணையத்தின் வழியாக நூல்களை வாசிக்கின்ற ஆர்வம் அதிகரித்து வருகின்றது.

கற்றவர் மாத்திரமல்ல, கல்லாதவர்களும் திறமையான பயிற்சிகளின் ஊடாக கணினிகளை இயக்கிப் பயன்களைப் பெறுகின்ற ஆற்றலைப் பெற்றிருக்கின்றார்கள் என்பதும் நாமறிந்த உண்மையாகும்.

இருந்தும் நன்மைக்குள் ஒளிந்திருக்கின்ற தீமைகள் நம்மை அணுகாமல் நாம் கணனியைப் பயன்படுத்துவோமானால் காலம் நமக்கு வசந்தமாக மாறி நிற்கும். காலத்தை வென்று நிற்கின்ற இக்கணினி பற்றிய ஆற்றலினால் மனிதன் தன்முன்னால் எழுகின்ற பல்வேறு சவால்களை வெற்றிகரமாக முறியடிக்கின்ற மனோபலம் உருவாகின்றது என்பது நிதர்சனமே.

கணினி, காலத்தை வென்று நமக்கான உடைமையாக நம் கரங்களில் தவழ்கின்றது என்பதே யதார்த்தமாகும்.

ஜன்ஸி கபூர் - 12.04.2021

வாழ்க்கைப் பாடங்கள்

 

உரசிச் செல்கின்ற நீரலைகள் இங்கு

உறவுகளின் பிணைப்புக்களை வருடுகின்றனவோ

தந்தை தாய் செல்லும் வழியில்

சிந்தை மகிழும் பாசச் சேய்கள்!

பெற்றவர் நிழலோடு பொருந்திடும் பண்பாடும்

பெற்றிடும் பாதுகாப்பும் ஈடில்லாத் துணைதானே

வாழ்வியல் அனுபவங்களை தாமும் கற்றிடும்

வாத்துக்களின் வாழ்க்கை நமக்கும் பாடமே

ஜன்ஸி கபூர் - 12.04.2021

 

சாதனைகள் சரித்திரமாகும்

சாதனைகள் சாகா வரம் பெற்றவை. உள்ளத்தில் உதிக்கின்ற எண்ணங்களுக்கு தன்னம்பிக்கையுடன் தொடர் முயற்சியும் பயிற்சியும் வழங்குகின்றபோது அங்கு வெற்றியின் வாசம் மனதினை நிறைக்கின்றது.

அடுத்தவர்களால் இயலாததொன்றை தன் இலட்சியமாகக் கொண்டு சாதிக்கின்ற வீரர்களை பிரமிப்புடன் நாம் பார்க்கின்றோம்.

எதனையும் சாதிக்கலாம். நம்மிடம் அதற்கான நம்பிக்கை மலையளவு நிறைந்திருக்கின்றபோது.....

அந்த வகையில்

தற்போது இலங்கை ஊடகங்களில் பேசப்படுகின்ற பெயர் ரொஷான் அபேசுந்தர

கடந்த 11.04.2021 இல் புதிய சாதனையை நிலைநாட்டினார்.

தலைமன்னாரிலிருந்து இந்தியாவின் தனுஷ்கோடிக்கும் மீண்டும் அங்கிருந்து தலைமன்னாருக்கும் 59.3 கிலோமீற்றர் தூரத்தை 28 மணித்தியாலங்கள் 19 நிமிடங்கள் 43 செக்கன்களில்  பாக்குநீரிணையில் நீந்தி புதிய ஆசிய சாதனையை நிலைநாட்டினார்.

பிரம்மிப்பான கொந்தளிக்கும் கடலலைகளையும் தன் ஆற்றலால் வசப்படுத்தி சாதனை புரிந்த இந்த இலங்கை விமானப் படையின் நீச்சல் வீரரை நாமும் வாழ்த்துவோம்.

அதே நேரம் 1971 ஆம் ஆண்டு 51 மணித்தியாலங்களில் மேற்கூறப்பட்ட சாதனையை நிகழ்த்தியிருந்த குமார் ஆனந்தனும் நினைவூட்டப்படுகின்றார்.

ஓவ்வொரு முயற்சிக்கும் ஊக்கமாக காணப்படுகின்ற சுவடுகளும் நினைவூட்டப்படுகின்றன.

ஜன்ஸி கபூர் - 12.04.2021

 

பயணம்

சின்ன வயதில் யாழ்ப்பாணத்திலிருந்து கொழும்பு செல்வதென்றால் மகிழ்வினை வார்த்தைகளில் வர்ணிக்கவே முடியாது. அதிலும் புகைவண்டிப் பயணம் என்றால் .......... 

கனவுகளைச் சுமந்து எதிர்பார்ப்புக்களை நெஞ்சில் தாங்கி சின்னச் சின்ன விடயங்களையெல்லாம் இரசித்து வாழ்ந்த அந்த பட்டாம்பூச்சிக் காலம் மறக்கப்பட முடியாத வசந்த காலம்...

வெளிநாடு செல்வதுபோல் கொழும்பு போவதற்காக புதிய ஆடைகள் தைத்து பல நாட்கள் ஆயத்தப்படுத்தலை மேற்கொண்ட அந்த சின்ன வயதுப் பருவம் இன்றும் கண்களில் மெலிதான விம்பம்போல் தெறித்துச் செல்கின்றது.

தந்தை அரச உத்தியோகத்தர் என்பதால் புகையிரத ஆணைச்சீட்டுப் பயணம். வுழமையாக கொக்குவில் புகையிரத நிலையத்தில் வைத்தே ஏறுவோம். எனக்கு எப்பொழுதும் ஜன்னல் அருகிலான இருக்கையே வேண்டும் என்பதால் என் பெற்றோர் அதனை ஒதுக்கித் தந்துவிடுவார்கள். நான் கடந்து செல்லும் ஒவ்வொரு ஊர் பற்றிய குறிப்பை எனது பதிவேட்டில் குறித்தவாறு பயணிப்பது எனது வழமை. இயற்கையின் இரசிப்பை மனதினுள் படரவிட்டவாறு பயணிப்பது அலாதி சுகம்தானே...

பிரம்மாண்டமான கொழும்பு கோட்டை புகையிரத நிலையத்தில் இறங்கியதும், அந்த பரபரப்பினை நுகர்ந்தவாறு முன்னே செல்கின்ற தந்தையைப் பின்தொடர்ந்து செல்வதும், அந்த நகரத்தின் நகர்வை அதிசயமாக உள்வாங்கிக் கொண்டதும் இன்றும் மறக்கப்படமுடியாத அழகிய கனாக்கள் போல்தான் இருக்கின்றது.

அப்பொழுது கொழும்புத் தண்ணீரைக் குடிக்கும்போது கசப்பதைப் போன்ற உணர்வு. வாப்பாவிடம் சொல்லி கடைகளில் சுடுநீர் வாங்கிப் பருகுவோம்.

ஆனால் யுத்தத்தால் இடம்பெயர்ந்து வேறு மாவட்டங்களில் வாழப் பழகிய பிறகு, அந்தக் கனவுப் பயணம் சுவையற்று இயல்பான ஒன்றாக மாறிவிட்டது. தண்ணீர் சுவையில்கூட மாற்றம் தெரியவில்லை. இரசிப்பின் வருடலை மனம் இழந்துவிட்டது போலும்..

காலம் மனதை மட்டுமல்ல வாழ்வையும் மாற்றிவிடுகின்றது..

ஜன்ஸி கபூர் -11.04.2021