ஒவ்வொரு தேடலின் துவக்கமும் என்னிருப்புக்கான/
அடையாளமாக நீள்கின்றன எதிர்பார்ப்புக்களை ஏந்தியபடி/
துளிர்க்கும் விடியலுக்குள் தடம்பதிக்கின்றேன் ஆர்வமாக/
வீழ்கின்ற அனுபவங்களையும் சேமிக்கின்றேன் முன்னேற/
அன்புக்குள் காதலும் மொழிக்குள் கவிதையும்/
உழைப்புக்குள் செல்வமுமென தேடல் விரிகின்றது/
ஒவ்வொன்றின் முடிவும் பிறிதொன்றின் ஆரம்பமாக/
முடிவுறுத்தப்படாத தேவைகளின் பன்முகங்கள் தொடர்கின்றன/
ஜன்ஸி கபூர் - 8.11.2020
தமிழே தவமெமக்கு தரணிக்கும் பாலமது
தாயின் மூச்சுக்காற்றால் தத்தானதே நித்திலத்தில்
செங்கரும்புச்சாறு பிழிந்தே செதுக்கிய எம்தமிழே
செல்லுமிடமெல்லாம் ஒலிக்கின்றதே செந்தமிழின் நாதம்
உயிரும் மெய்யுமாகி உணர்வுக்குள் உறைந்தே
உயிர்க்கின்றாய் அழகாக உன்னத மொழியாகியாகி
தொடக்கப்புள்ளியாய்க் குவிந்தே தொடர்கின்றாய் வாழ்வினில்
தொன்மைத் தமிழென மகுடமேந்தி தித்திக்கின்றாய்
சிங்கமொழியே சிரிக்கின்றாய் அங்கத்தின் மூச்சுக்காற்றாகி
சிந்தைக்குள் குளிர்ந்தே சித்தமெங்கும் நிறைகின்றாய்
வீழ்வாயோ தமிழே வீழ்த்திடுமோ நவீனமும்
விரிகின்ற பொழுதெல்லாம் விரிகதிர் நீதானே
ஜன்ஸி கபூர் - 05.11.2020
உணர்வுகள் ஒன்றியே/
உறவுக்குள் இணைந்தோம்/
உன்னதமான வாழ்வுக்குள்/
வளர்கின்றது நம் குடும்பம்/
ஜன்ஸி கபூர் - 08.11.2020
