படிக்காத மேதை

 பாமரன் சிந்தைக்குள்ளும் அறிவுண்டு தானும்/
கற்றிடும் திருக்குறளாய் வாழ்ந்திடும் நெறியுண்டு/
சுற்றியோடும் அனுபவங்களாய் இசைந்திடும் துணிவுண்டு/
படிக்காத  மேதைக்குள் மனிதமெனும் ஞானமுண்டு/

ஜன்ஸி கபூர் 

• 
  

  
  
  

    

எண்ணம் போல் வாழ்க்கை

அற்பமான வாழ்வுக்குள் அற்புத எண்ணங்கள்/
கற்பகதருவாய் வாழ்ந்திடலாம் பிறருக்கும் பயனாய்/
பெற்றோரைக் காத்திடும் பொற்கரங்கள் யாவும்/
போற்றப்படுமே சுற்றும் பூமியின் அச்சாணியாய்/

மனதின் நீட்சியே குணமாகிப் போகும்/
கனவும் வாழ்வின் தொடராகி மோதும்/
பகட்டினில் மதியிழந்து கடன்படும் வாழ்வும்/
அகத்தினில் துன்பம் ஊற்றிக் கரைக்கும்/

நன்றும் தீதும் நம்மையே தொடரும்/
என்றும் செயல்களே விதியாகிக் கூடும்/
சேர்க்கும் நட்புக்களும் நிறமாற்றிப் போகும்/
வார்த்திடும் நல்லவற்றால் மனிதம் பூக்கும்/

சித்தம் நிரப்பும் சத்தியம் நமதாக/
நித்தம் சூழும் உறவுகளின் இதமாக/
அன்பைப் பகிரும் நெஞ்சின் அரணாக/
இன்பத்துடன் வாழ்ந்திடலாம் புன்னகைகளைச் சுமந்தபடி/

ஜன்ஸி கபூர் 

• 
  

  
  

   

   

மாறுவோம்

அதிகாரம்  மிடுக்கல்ல இலக்கிற்கான துடுப்பே
மதி கெடுக்காத வல்லமையே மாண்பாகும்
விதியையும் வெல்லலாம் சமத்துவப் பேணலிலே
புதிதாய் பூப்போம் அறநெறியில் வாழ்வோம்

ஜன்ஸி கபூர்  

•  

புத்தம்புது பூமி வேண்டும்

புத்தம்புது பூமி வேண்டும் அழகாக/
சித்தம் மகிழும் வாழ்வும் நமதாக/
சத்தம் கலக்காத காற்றும் சுவாசமாக/
நித்தம் நலம் பேணும் நிலமாக/

மாசு அற்ற இயற்கையே வரமாக/
காசு தேடா வாழ்க்கையே இருப்பாக/
பசுமை தெளிக்கும் தருக்களே அரணாக/
ஆசு தேடா மக்களே உயிர்ப்பாக/

பூக்கள் வாசம் மனங்களின் நேசமாக/
காக்கும் கரங்கள் இறையோன் ஆசியாக/
தாக்கும் தொற்றுக்கள் நீக்கும் மருந்தாக/
பாக்கள் தளிர்க்கும் தமிழ்மொழி   விருப்பாக /

மாற்றிடும் நம்மைச் சுமக்கும்  தேசம்/
ஆற்றிடும் இன்னல் ரணங்களைத் தேகம்/
மறைத்திடும் பொங்கும் வன்முறை  மோகம்/
குறைந்திடும் வாழ்வில் வறுமைத் தாக்கம்

ஜன்ஸி கபூர்  

•