கற்கும் கல்வியும் கண்ணியம் காத்திட
சொற்கள் பழக்கும் சொல்வளம் அவரே
அறியாமை நீக்கி அறிவைப் பெற்றிட
நெறியாய் விளங்கி நெடுநாளும் வாழ்த்துவாரே
ஏணியாய் மாறி ஏற்றத்துடன் வாழ்ந்திட
பணி செய்திடும் பண்பாளரும் அவரே
மழையாய் பொழிந்து மனங்களில் நிறைந்து
ஏழையும் வாழ்ந்திட எந்நாளும் உழைப்பாரே
இருள் வாழ்வும் இன்னல்கள் அகற்றிட
அருள் புரிந்திடும் ஆசானும் நிறைவாரே
ஜன்ஸி கபூர் - 01.08.2020
கன்னத்தில் உரசுகின்ற கருங்கூந்தல் வளைவும்
இன்பத்தில் நனைகின்ற கூர்விழி அழகும்
புன்னகைத் தித்திப்பில் கரைந்தே வழிகையில்
வெண் முத்துக்கள் இதழுக்குள் வழுக்குகின்றதோ
மோகத்தை வருடுகின்ற வெண்சங்கு கழுத்தினில்
மெல்லிய வருடலாய் துளிர்க்கின்ற மச்சமும்
அல்லி பிழிந்தெடுத்த அற்புத தேகத்தினுள்
மென் கீற்றாய் வெட்கத்தின் வாசமும்
மின்சாரம் பாய்ச்சுகின்ற மோகனப் புன்னகையில்
என்னிதயம் அடிக்கடி நழுவி வீழ்கிறதே
உந்தன் இமைக்குள் காந்தத்தின் ஈர்ப்போ
உயிரோடு வருடுகின்ற பேரன்பும் நீ
சந்தனம் வழிகின்ற தேகத்தின் துடிப்பினில்
சர்க்கரையாய் மொய்க்கின்றதே மயக்கிடும் விழிகள்
சாய்கின்றாய் தென்றலில் சரிகின்றேன் நானும்
சரமாக்கி சூடுகின்றாய் அன்பை என்னுள்
தொலைகின்றேன் நானும் தனிமையுடைத்து உன்னுலகில்
அலைகின்றாய் எனக்குள் நீங்காத நினைவாக
கலைகின்றதே சோகங்களும் சலங்கைச் சிரிப்பினில்
கனவுகளும் உயிர்க்கின்றதே எனையும் அணைப்பதனால்
காத்திருக்கிறேன் தினமும் காதலும் மொய்த்திருக்க
கசங்கிடாப் பூவே உந்தன் நுதலினில்
எந்தன் ரேகைதனைப் பதித்திடும் நாளுக்காய்
உறைகின்றேன் ஏக்கத்தினில் காலத்தை எதிர்பார்த்தபடியே
ஜன்ஸி கபூர்
முயற்சியும் பயிற்சியும் உயர்வின் படிகளே/
முன்னேற்றம் கண்டிலாம் இலக்கின் பாதையினில்/
கடக்கின்ற மணித்துளிகள் உழைப்பிற்கே தடமானால்/
உடைந்திடுமே தடைகளும் ஊக்கத்தின் விளைவினிலே/
செல்கின்ற பாதைக்குள்ளே தோன்றிடுமே முட்களும்தான்/
வெல்கின்ற எண்ணமிருந்தால் சோர்வில்லா வலிமையெழும்/
தன்னம்பிக்கை தீட்டுகின்ற ஆளுமைப் பாதையினை/
கண்டிலாம் சாதனைகள்தான் ஏற்றத்தின் வாழ்வினிலே/
இறையும் மறையும் இணைந்திருக்கும் ஒழுக்கத்தினில்/
இதயமும் தொழுதிடும் விழுமியப் பயணத்தினில்/
நல்வாழ்வும் நமதாகும் நாடியதோ நலமாகும்/
நல்லவற்றை பெற்றிடவே நாளும் முயன்றிடலாம்/
இன்ப மனநிலையில் உழைத்திடும் ஆசையெழும்/
இவ்வுலக வாழ்க்கைக்குள்ளே வெற்றியின் வாடையே/
தற்பெருமை அழிந்திடுமே பேராற்றல் முகட்டினிலே/
தன்னார்வ நீட்சிக்குள்ளே சிகரமும் தொடுமே
ஜன்ஸி கபூர் - 01.08.2020
மேக மழையின் மோக எழுச்சி
தேகமும் நனைந்திட விளைச்சலாய் வெள்ளமே
வேக நீரின் ஊற்றினில் கரைந்திடும்
பாதக வாழ்வுக்குள் தாழ்ந்திடுமே பாரே
ஆழிக்குள் திமிரெடுக்கும் பேரலைப் புரட்சியும்
அழித்திடுமே வாழிடம் அண்டத்தின் சுவடுகளையும்
வெட்டிடும் மின்னலும் வேரறுக்கும் பசுமையை
திட்டிடுமோ இயற்கையும் தீங்கிழைத்த மாந்தருக்கே
பனிப்பூக்கள் சிதறுகையில் உருகிடுதோ தென்றலும்
தனிப் பாதையோரம் பனியின் ஆவேசம்
மனித வேட்கையினில் மாறியதோ இயற்கையும்
மறந்த விழுமியம் அழிவின் உச்சத்தில்
நெகிழி தடையின்மை வருத்திடும் ஓசோனை
நெஞ்சமும் பிழிந்தூற்றும் இயற்கைச் சீற்றங்களை
நெருடட்டும் மண்வாசனையும் நெடுங்கால வாழ்வுக்கே
பெருந்துன்பம் வேண்டாமே என்றைக்கும் தலைமுறையினருக்கும்
ஜன்ஸி கபூர்
