அடுப்பூதும் பெண்ணென்றே அடக்கினார் பெண்மைதனை/
அடிமைத்தளை அறுத்தே அரசாண்டாள் மங்கம்மா/
ஆண்களின் கரந்தனில் ஆட்சியெனும் மரபுடைத்தே/
அணிந்தாள் மகுடமும் அலங்கரித்தாள் சிம்மாசனமும்/
கணவன் இறப்பில் காணவேண்டும் உடன்கட்டை/
கட்டாய மரபினையும் காரிகை யுடைத்தே/
காத்தாள் நாட்டை கணவர் தடமொற்றி/
தாயின் அறிவுரைகளைத் தங்கமகனும் ஏற்றே/
தரணியை ஆள்கையில் தவித்தானே நோயினில்/
தன்னுயிரும் நீத்தே விண்ணேகையில் துணையவள்/
தானும் பறந்தாள் தன் துணையுடனே/
மதுரையும் ஆண்ட மங்கையிவள் தினமும்/
மக்களும் செழித்திட மாண்போடு ஆண்டாளே/
மதிநுட்ப செயல்கள் மலைபோல் குவிந்திட/
மங்கள முரசினில் மகிழ்வுற்றதே மாநகரும்/
பேரனும் முடிசூட்ட போர் நுட்பங்களால்/
பேராட்சி புரிந்தே பெருவெற்றியும் கண்டாள்/
போரில்லாச் சூழலே பேருவகை என்பதை/
பொருத்தியே மனதினில் மதித்தாளே மதங்களை/
பாசனசாலைகள் கோயில்களென பாரதத்தில் சிறந்திடவே/
பாதைதனைக் காட்டிய பாவைதானே மங்கம்மா/
தர்மசாலைகளை அமைத்தே தானமும் புரிந்தாள்/
தந்திரோபாய யுத்திகளால் தன்படைக்கும் வழிகாட்டினாள்/
முகாலயர்களின் இன்னல்கண்டும் முகமது சுளிக்காதே/
முன்னின்று விரட்டினாள் நாயக்கர் படைதனை/
மதிநுட்பம் தந்திரங்களால் மன்னர்களை வென்றே/
மங்கம்மாவும் கண்டாள் மாண்பான வெற்றிகளையே/
வறட்சி போக்க வடிவமைத்தாள் குளங்களை/
வளங்கள் பெருகவே வரம்புகளும் உயர்ந்தனவே/
சத்திரங்களும் கல்விச்சாலைகளுமென சமுதாயப் பணியிலும்/
சளைத்திடா இராணியிவள் சமுகத்தின் ஏணிதானே/
இதயங்களில் உயர்ந்தே இமயமாக மிளிர்ந்தவள்/
இரக்கமில்லாப் பேரனால் இறக்கினாள் மணிமுடியை/
இறக்கையில் ஊமையாய் இவ்வுலகையும் நீத்தாள்/
இராணி மங்கம்மா இராச்சியங்களின் சொப்பனம்தான்/
அறிவின் ஒளியாய் அழகின் சுடராய்/
ஆணுக்கு நிகராய் அவனிக்கும் தலைமையாய்/
அணிந்திட்ட பொறுமையால் அடையாளமுமானாள் நமக்கும்/
சரித்திர நாயகியின் சாதனைகள் என்றும்/
சரியாதே நானிலத்தில் சப்தங்கள் ஓயாதே/
மங்காது வாழ்வாள் மக்கள் மனங்களில்/
மங்கம்மா என்றுமே மகத்தான இராணியவள்/
ஜன்ஸி கபூர் - 4.11.2020
