வண்ணக்குடை

 

வண்ணக்குடை/

பல நிறங்களில் விரிகின்றது/

வாசிக்கும் ஆற்றல்/

ஜன்ஸி கபூர்

கடிகாரம் உணர்த்தும் பாடம்

 

தேடல்மிகு வாழ்வின் ஒவ்வொரு நகர்விலும்/

தேடிக் கலக்கிறதே கடிகார முட்கள்/

நாடிப் பற்றிடுவோம் அதன் பண்புகளை/

ஓடிவிடுமே துயரும் செழித்திடுமே வாழ்வும்/

முன்னோக்கிச் செல்லுகின்ற முட்களைப் போல்/

முன்னேற்றம் கண்டே மகிழ்ந்திடலாம் செயல்களில்/

குறித்த ஒழுக்கினில் சுற்றும் கடிகாரம்போல்/ 

பற்றிடுவோம் நாமும் கலாசார விழுமியங்களை/

மின்கலம் இன்றியே இயங்கிடுமோ இதுவும்/

வேண்டுமே நமக்கும் ஊக்கத்துடனான உழைப்பும்/

தாமதிக்கும் நிமிடங்கள் நழுவுமே வெற்றிகள்/

தரணியின் உயிர்ப்புக்கும் இதுவோர் அடையாளமே/

 ஜன்ஸி கபூர் - 23.10.2020

 

பொன்னாடு

 

பண்பாட்டின் விழுதுகள் பற்றிடும் நாட்டினில்

எண்ணத்தின்  கலைகளும் இசைந்திடும் வனப்போடு

பண்ணும் பரதமும் அசைத்திடும் மண்ணை

விண்ணும் போற்றிடும் உழவுக்கும் உயிர்கொடுத்தே

ஆய கலைகளும் அரங்கேறிடும் மடிதனில்

தேயாத ஈகையில் விருந்தோம்பலும் உயிர்த்திடுமே

ஓயாத கரகோஷத்தில் சல்லிக்கட்டின் வீரமும்

வாயாரப் புகழுமே பாரம்பரியக் கலைகளும்

ஏட்டறிவின் ஆற்றலும்  வளமாக்குமே வளங்களை 

நட்ட பயிரெல்லாம் சிரித்திடுமே உழவுக்குள் 

வள்ளுவன் குரலாய் ஒலித்திடும் தேனாட்டில்

உள்ளத்தின் உயர்வால் பண்பாடும் வாழ்ந்திடுமே

ஜன்ஸி கபூர் 

யாதும் ஊரே யாவரும் கேளிர்

யாதும் ஊரே யாவரும் கேளிரென்ற

கணியர் கருத்தால் காசினியும் உவக்கும்

காலம் போற்றும் வாழ்வியல் முறையினை

உணர்ந்தே ஏற்றால் வாழ்வும் சிறக்கும்

உலக மக்கள் யாவரும் ஒன்றென

உறவாய்க் கருதி உணர்வால் கலப்போம்

எல்லா ஊரும் எமக்கு ஒன்றே

ஏற்போம் மக்களை அன்பால் கவர்ந்தே

வாழ்வில் தொடரும் நன்மை தீமை

வந்தணையும் இன்பம் துன்பம் யாவுமே

வருமே ஊழால்தானே தருவாரோ பிறரும்

அறத்தின் நிழலாய் ஒழுகுவோம் உணர்வினை

இறப்பும் பிறப்பும் புதுமை நிகழ்வோ

இறைவன் சித்தம் இயற்கை வழியே

இவ்வுலக இன்பமும் துன்பமும் நீடிக்குமோ

வெறுப்பினால் உரைத்திடலாகுமோ உலகம் இனிதன்று

கார்மேகம் பிணைந்தே ஊற்றும் மழைநீர்

களிப்பினில் ஒன்றாகுமே பேராற்று நீராகி

இயற்கையின் மடியினில் இசைந்திடுமே வாழ்வும்

இன்மொழி நவின்றனரே ஆன்றோரும் முன்னர்

பெரியோரைப் பெருமையில் வியந்தே பார்த்திடலும்

எளியோர் சிறியோரை இகழ்ந்தே தூற்றலும்

தவறென்றே உணர்ந்திடுவோம் சரிநிகராக மதித்திடுவோம்

தரணிக்குள் சமத்துவம் பேணியே வாழ்ந்திடுவோம்

ஜன்ஸி கபூர்