வலி

சேயவள் முன்னாடி பெத்தவளும் பேயாக
வைகின்றாள் வார்த்தைகளால் பிஞ்சும் வெம்மிடவே
மெய்யினை மொய்க்கும் விரல் தழும்புகளுமே
பொய்யான வாழ்வின் சோகங்களோ குழந்தாய்

படித்திடென்றே அடிக்கின்றனர் ரசிக்கின்றனர் கண்ணீர்
துடிக்காத தாய்மை வெடிக்கின்றதே நெருப்பாய்
அழுதிடதே குழந்தாய் பழுதுமில்லா வாழ்க்கை
அன்பும் கொண்டேன் துடிக்கின்றேனுன் வலியில்

ஜன்ஸி கபூர்

நினைவினில் நிறைந்தவனே

 

நெஞ்சில் நிறைந்தவனே நெசமாகத்தான் உன்னன்பில்/
தஞ்சமாகிப் போனேனே செவ்விதழும் தேனூற்ற/
அஞ்சவில்லை உந்தன் நிழலுமெனைக் காக்கும்/
பஞ்சமில்லை வாழ்வில் வசந்தமே நீயாய்/

நித்தம் என்னுள் துயிலைத் துகிலுரித்தவனே/
சித்தம் ரசிக்கும் உன்னைக் கண்டாலே/
சத்தமிடுகின்றதே வெட்கமும் உயிரைப் பிசைந்தே/
மொத்தமாய் உருகுதே தனிமையும் இனிமையாய்/

பறந்திடும் நொடிகளால் துறந்திடுமோ மெய்க்காதல்/
உறங்கிடும் இரவிலும் துணையுன் நினைவுகளே/
நறவாகிக் கசியுதே உன்னால் பொழுதெல்லாம்/
நல்லறமாய் இனித்தே நல் வரமுமானாய் /

பெண்மை போற்றிடும் உந்தன் பண்பாலே/
எண்ணம் உயர்த்தினேன் சிகரமும் தொட்டிடவே/
கண்டேன் உன்னில் அறமாய்க் காதல்/
கண்ணாளா வாழ்ந்திடலாம் காலமெல்லாம்  ஒன்றாகி/

ஜன்ஸி கபூர் 

சாதனை நாயகன்

அலைகள் கொஞ்சும் இராமேசுவர மடியும்/
தலைசிறந்த பொக்கிசமே தலைவனைச் சுமந்ததால்/
நிலையற்ற வாழ்வில் இமயமாய் வறுமை/
மலைத்திடத் துயரும் உயர்ந்திட்டார் கல்வியால்/

விருதுக் கிரீடங்களால் கலைகளும் ஒளிர/
கரும்புச்சுவையை பிழிந்தூற்றிய அக்கினிச் சிறகும்/
பருவ வயதினர் வாழ்க்கையை வெல்ல/
பாதைகள் வகுத்திட்டார் கனவுகளும் இலட்சியமாய்/

அறிவு விரல்கள் ஆராய்ந்தன விண்ணை/
ஆற்றலின் உச்சத்தில் தந்தையுமானார் ஏவுகணைக்கே/
ஆளுமைத் தளம் நீண்டதே குடியரசில்/
அகிலமே வியந்திட்ட  அன்புக்குள்ளும்  நின்றார்/

இலட்சிய வேட்கையால் உதிர்ந்தன  உறுதிமொழிகள்/
இன்னல் உறுஞ்சிடும் பொன்னான திட்டங்கள்/
இமயமாய் உயர்ந்திட்ட சாதனை நாயகன்/
இதயங்களில் வாழ்கின்றார் இறவாமல் உயிர்த்தே/

ஜன்ஸி கபூர்
யாழ்ப்பாணம்

சிந்தையில் வேண்டும் சிறப்பு

உள்ளத்தி லன்பும் உறவாடப் பெற்றாலே /
கள்ளத்தில் நீங்காக் கபடங்கள் நெஞ்சினில் /
நிந்திப்போர் நம்மை நினைத்தேதான் வாழ்ந்திடச் /
சிந்தையில் நீயும் சிறப்பு /

ஜன்ஸி கபூர்