மெல்லிய பனித்தூறல் மேனி வருடுகையில்/
புள்ளிகளும் விரல் தொடுகின்றன பூரிப்பினில்/
மார்கழியின் மாக்கோலம் வாசலிலே பூக்கும்போது/
விடிகாலைப் பொழுதும் புலர்கின்றதே மங்கலத்துடன்/
பண்பாட்டின் கண்ணாடியாக மிளிர்கின்றதே கைவண்ணமும்/
ஜன்ஸி கபூர் - 17.12.2020
2021/04/13
ஓவ்வொரு பூக்களுமே
ஓவ்வொரு பூக்களும் மகிழ்கின்றதே தினமும்/
உரமாகிப் போகின்ற வாழ்வைத்தான் எண்ணி/
நீராடும் மேகங்களும் மோதுகின்றதே ஒளியோடு/
சீராகப் பொழிந்திடவே இலட்சியம் கொள்ளுதே/
இருள் தொடாமல் விடியல் பிறந்திடுமோ/
இடர் காணாமல் வாழ்வும் தொடர்ந்திடுமோ/
பாறையாக மாறு தடைகளும் தூளாக/
போராட்டம் காணாத வாழ்வுமுண்டோ பாரினிலே/
உள்ளத்தின் வலிமையை உணர்ந்திடு நீயும்/
உடைந்திடும் கண்ணாடியல்ல உணர்வுகளின் கூடது/
விழி மூடினால் காட்சிகள் தோன்றுமோ/
வலிக்குள்ளே வழியுமுண்டு பாதையைத் தேடிடு/
மிதிபடும் மண்ணிலேயே தங்கமும் தலைகாட்டும்/
சதியை உடைத்திடும் சாவியுண்டு சிந்தனைக்குள்/
நதிக்குள் அணையிட்டால் பயிரும் நனைந்திடுமோ/
விதியையும் மதியாலே வென்றிடும் விதையாகு/
வெற்றுப் பாறைக்குள்ளும் வீழ்கின்ற விதைகள்/
முளைப்பதுண்டு இயற்கையின் இதமான அணைப்பினில்/
முடிவு என்பதே முதலின் புள்ளியே/
முயற்சியின் பலனில் முன்னேற்றம் கரங்களிலேயே/
சிரித்திடு துக்கமும் தொலைவினில் பறந்திட/
விரித்திடு சிறகினை வானும் அருகாக/
தரித்திடு இலட்சியத்துள் தடங்கள் வசந்தமாக/
உரித்திடு துக்கத்தை சுமைகள் தூரமாக/
நிலையற்ற வாழ்வில் கலைகள் பூக்கையில்/
விலையற்ற வாசமாக நிம்மதியும் பூக்குமே/
மனமே தேடு உனக்குள் உன்னையே/
மலையும் மடிதருமே உன்னால் சிலையாக/
ஜன்ஸி கபூர் - 22.12.2020
யாரோ கிசுகிசுத்தார்
இருள் தொலைகின்ற நிலவுப் பயணத்தில்
அலைப் புன்னகையினை ரசித்தபடி தழுவுகின்ற
ஈரக் காற்றின் இதமான வருடலில்
ஓராயிரம் கனவுகளை உயிர்ப்பிக்கின்ற ஆசைகளுடன்
நாமிருவர் தனியாகப் படகேறிப் பயணமொன்று
செல்ல வேண்டுமென்று யாரோ கிசுகிசுத்தார்
முற்றுப் பெறாத கடலலைத் துடிப்பினைப் போல
ஒருவரை ஒருவர் அன்பினால் பற்றி
வெற்றிட வாழ்விற்குள்ளும் உயிர்ப்பினை நிரப்பி
அடுத்தவர் விழித் தேடலுக்குள் விரிகின்ற
அழகான வாழ்க்கையாக நாமும் மாறுவோமென
நமதான பயணம்பற்றி யாரோ கிசுகிசுத்தார்
துள்ளியோடுகின்ற மீன்களை அள்ளிச் செருகி
கள்ளத்தனமாக விழிகளில் வைத்திருக்கின்ற உன்னுடன்
இசைகின்ற எனது இதயத் துடிப்பொலிகளையும்
ஏந்திக் கொண்டே அலைகின்ற அலைகளில்
நீ நனைகின்ற போதெல்லாம்
நுரைப் பூக்களால் உனக்கு மாலையிட்டு
கரை தொட்டிடாத நீண்ட பயணத்தில்
உன்னிழலுடன் ஒன்றிக்கிடக்க மனம் ஏங்குகின்றது
ஏன்தானோ இக்காலம் இன்னும் வரவில்லை
இன்னும் என் பணிகள் உள்ளனவோ
ஆதவன் சிறகசைத்து மெல்லக் கீழிறங்குகையில்
நீயும் எனது எதிர்பார்ப்பிற்கு கைவிலங்கிட்டு
பிரிய ஆயத்தமாகின்றாய் பிரியமனமின்றி நானும்
தொலைக்கின்றேன் உன்னை மறைகின்றாய் அந்திக்குள்
விண்ணுக்கே முகவரியாகி மின்னும் உன்னை
நினைவூட்டுகின்றன குறையொளியில் கண்ணுக்குத் தெரிகின்ற
கரையை நாடுகின்ற கடல்ப் பறவைகள்
நீ ஒளிந்து கொண்டிருக்கின்ற தொலைப்புள்ளியின்
முடிச்சவிழ்த்து மூச்சினை நிரப்பிடத் துடிக்கின்றேன்
அடுத்தவர் அறிந்திடாத நமக்கிடையிலான தூரம்
எமக்கு மட்டும் தானே தெரியும்
வேறு எவருமே அறிந்திருக்க மாட்டார்கள்.
ஜன்ஸி கபூர் - 26.12.2020
Kesavadhas
ஜன்ஸி கபூர்
மிகவும் ரம்மியமான வர்ணனை பாலுமகேந்திரா காமிரா போல் நம்மைச்
சூழலுக்குள் கொண்டு நிறுத்துகிறது!
இருள் தொலைகிறது!
நிலவுப் பயணம்!
அலைப் புன்னகையை ரசித்தபடி தழுவும் ஈரக்காற்று!
இதமான வருடல்!
ஓராயிரம் கனவுகள் உயிர்பிக்கின்றன ஆசைகளை!
நாமிருவர் தனியாகப் படகேறிப் பயணிக்க யாரோ கிசுகிசுத்தார்!
நமதான
பயணத்தைக் குறித்தும் யாரோ கிசுகிசுத்தார்;
அன்பினால் பற்றி
வெற்றிட வாழ்வுள் உயிர்ப்பை நிரப்பி
அடுத்தவர் விழித்தேடலுக்குள் விரிகின்ற
அழகான வாழ்க்கையாக நாமும் மாறுவோமென நமதான பயணம் குறித்து யாரோ கிசுகிசுத்தார்!
உன்னிழலில்🔥ஒன்றிக் கிடக்கவே மனம் ஏங்கியது!
ஏன்தானோ இன்னும் இக்காலம் வரவில்லை!
விண்ணிற்கு முகவரியானாய்
தொலைப்புள்ளி முடிச்சவிழ்த்து மூச்சினை நிரப்பிடத் துடிக்கிறேன்!
நமக்கிடையேயான தூரம் நமக்கு மட்டுமே தெரியும்!
இந்தக் கவிதையில் எல்லாமே வெளிச்சத்தில் தான் சொல்லப் பட்டிருக்கிறது!
ஆனால் அந்த அழகான மதுரச மயக்கும் வர்ணனைகள் கவிதைக்கு ஓர் இருண்மை தருவதோடு
வாசிக்கும் ஆர்வத்தையும் தூண்டுகிறது!
உளம் கொண்ட வர்ணனை வரிகள்
துள்ளியோடுகின்ற மீன்களை அள்ளிச் செருகி
கள்ளத்தனமான விழிகளில் வைத்திருக்கின்ற
உன்னுடன் இசைகின்ற
எனது இதயத் துடிப்பொலிகள்
ஏந்தி அலையும் அலைகளில்
நீ நனைகிற போதெல்லாம்
நுரைப்பூக்களால் உனக்கு மாலையிட்டு
கரைதொட்டிடாத நீண்ட பயணத்தில்
உன்னிழலுடன் ஒன்றிக் கிடக்க மனம் ஏங்குகிறது!
விண்ணுக்கே முகவரியான உன்னை நினைவூட்டும் கடல்பறவைகள்!
வாழ்த்துகள் கவிஞரே!
உன்னிடம் மன்றாடுகின்றேன்
உன்னிடம் நானும் மன்றாடுகின்றேன் ஜானு
உடைத்து விடாதே மல்லிகைச் செடியினை
நிதமும் மல்லிகை மொட்டுக்களில் மணக்கின்றது
உன் அழகான புன்னகையின் வாசம்
உன் கள்ளமில்லா மனதின் பிம்பத்தில்
உயிர்க்கின்ற உயிர்ப்பூக்களை நானும் நேசிக்கின்றேன்
உன்னிடம் நானும் மன்றாடுகின்றேன் ஜானு
சுவரேறி என்னைச் சந்திக்க முயற்சிக்காதே
மதிலில் படர்ந்திருக்கின்ற பாசியின் பசுமைக்குள்
தெரிகின்றதே நம் உலராக் காதலும்
சூரிய ஒளியின் சுகத் தரிசிப்புக்களில்
பூரிக்கின்ற இயற்கையை நானும் நேசிக்கின்றேன்
உன்னைப் போல பாதுகாத்திடத் துடிக்கின்றேன்.
உன்னிடம் நானும் மன்றாடுகின்றேன் ஜானு
முற்றத்து தாமரைக் குளத்தின் நீரை
அவசரப்பட்டு வெளியே இறைத்து விடாதே
அழகிய குட்டிக் குளத்தின் சாம்பிராஜ்யத்தின்
அங்கித் தொடர்புகளில் நிழலாடுகின்றன நம்முறவுகள்
தளம்பும் நீருக்குள் தள்ளாடுகின்ற இலைகளை
நனைக்காத நீர்த்துளிக்குள் தெளிவாகத் தெரிகின்றது
உதட்டோரப் புன்னகையுடன் பிரகாசிக்கின்ற முகம்
உன்னிடம் மன்றாடுகின்றேன் ஜானுக் குட்டி
உன் காலடிக்குள் பற்றையாகப் பூத்திருக்கின்ற
தொட்டாச்சுருங்கிப் பூவினை நீயும் மிதிக்காதே
தொட்டதும் சுருங்குகின்ற இலைகளுக்குள் காண்கின்றேன்
ஊடலால் முகம் சோர்கின்ற உன்னை
உன்னிடம் மன்றாடுகின்றேன் ஜானுக் குட்டி
மழைக்குள் நசிந்து சிதறுகின்ற மலரிதழ்களை
நீயும் மிதித்து மென்மையைச் சிதைக்காதே
உன் மென்மையான இதயத்தின் வருடலை
இழக்கின்ற பிரமைக்குள் தவிக்கின்றது மனதும்
நம்மைப் பிரிகின்ற பெற்றோரின் கண்ணீராகி
என்னையும் நனைக்கின்றது அந்த ஈரம்
அஞ்சுகின்றேன் என் சகோதர்களும் உன்றன்
உணர்வினைக் காயப்படுத்தி நம்மைப் பிரிப்பார்களோவென்றே
உன்னிடம் மன்றாடுகின்றேன் ஜானுக் குட்டி
வேலிக்குள் விளக்கேற்றும் ரோசாச் செடிகளை
என் நினைவாகத் தொட்டுப் பார்த்திடாதே
வெட்கத்தில் சிவக்கின்ற என் கன்னத்தை
நீயும் காணாமல் போய் விடுகின்றாய்
பக்கத்தில் விரிந்திருக்கின்ற முட்களைப்போல் பாதுகாக்கின்ற
பெற்றோரின் வெஞ்சினத்தில் நீயும் துன்பப்படுவாயென
அஞ்சுகின்றேன் நானும் உன்மீதான அன்பினால்
ஜன்ஸி கபூர் - 18.12.2020
Kesavadhas
ஜன்ஸி கபூர்
தனது தனித்துவத்தை மீண்டும் நிரூபிக்கிறார் கவிஞர் இக்கவிதையின் வாயிலாக!
மாதிரிக் கவிதைகளின் கருத்தோ எதிர்மறைக் கருத்தோ கூட கவிஞர்களின் கவிதைகளில் வரலாம்!
ஆனால் சொல்லும் வகையில் சொற்களில் வார்த்தைகளில் உவமங்களில் வர்ணனைகளில் படிமங்களில் சொல்லோவியமாக தரும் வகையில் தான் தனித்துவம் தெரியும்!
இந்த கவிஞர் கொடுக்கப் பட்டப் பொருள் மற்றும் கருத்திலிருந்து மாறுபடுவதில்லை!
ஆனால் அணுகும் விதத்தில் சொற்பிரயோகங்களிவ் படிமங்களில் வெற்றியை தனது வசமாக்கிக் கொள்ளும் வித்தை இவரிடமுளது!
கவிதைக்குள் போகலாம்!
ஜானு முறித்துவிடாதே ஜாஸ்மின் செடியை!
மல்லிகைச் செடியில் மணக்கிறதுஉன் புன்னகையின் வாசம்!
கள்ளமில்லா மனத்தின் பிம்பம் உயிர்க்கின்ற உயிர்ப்பூக்கள்
சூரிய ஒளியின் சுக தரிசுப்புகளில் பூரிக்கும் இயற்கையாக நானும் நேசிக்கிறேன்!
பாசியின் பசுமைக்குள் தெரிகிறது நமது உலராக்காதல்
முற்றத்து தாமரைக் குளத்து நீரை இறைக்காதே!
குட்டிக்குளம் அங்கித் தொடர்புகள் நிழலாடுகின்றன. நம்முறவும் தளும்பும் நீருக்குள் தள்ளாடும் இதயம் நனையாத நீர்த்துளிக்குள் தெரிகிறது!
தொட்டாச் சுருங்கி இலைகள் சுருங்குகையில் ஊடலில் சுருங்கும் உன்முகத்தை ஞாபகமூட்டுவதால் அப்பூக்களை மிதிக்காதே!
(தொடரும்)
Kesavadhas
ஜன்ஸி கபூர் தொடர்ச்சி
மழைக்குள் நசிந்து சிதறும் மலரிதழ்களை மிதித்து மென்மையைச் சிதைக்காதே!
மென்மையான இதயவருடலை இழக்கின்ற பிரமைக்குள் தவிக்கிறது மனம்!!
பெற்றோர்களின் கண்ணீரின் ஈரம் என்னை நனைக்கலாம்!
அதனால் எழும் சகோதர கோபம் நம்காதலைச் சிதைக்கலாம்!
ரோசாப்பூக்கள் சிதைந்தால நாணத்தால் சிவக்கும் என்கன்னங்களை நீ பாராய்!
என் பெற்றோரின் வெஞ்சினத்தால் நீயும் துன்புறுவாய்!
உன் காதலுக்காகவே அத்தனையும் சொல்கிறேன்!
காதலே பெரிதாகத் தெரிகிறது
இக்கவிதையில்!
சில வார்த்தை பிரயோகங்கள் பிரத்யேகமானவை!
சமூக ஒளியின் சுகதரிசிப்புகள் பூரிக்கின்ற இயற்கை
தளும்பும் நீருக்குள் தள்ளாடுகின்ற இலைகளை நனைக்காத நீர்த்துளிக்குள்
தெளிவாகத் தெரியும் உதட்டோரப் புன்னகை
இதயத்தின் வருடலை இழக்கின்ற பிரமைக்குள் தவிக்கின்ற மனது
இவைகளுக்காகவே தனியொரு சபாஷ் தரலாம்!
சாம்ராஜ்யம் சரிபார்க்கவும்!
அங்கிகள் எப்பொருளில் பயன்படுத்தப்பட்டது!
மொத்தத்தில் பிரமிப்பு!
வாழ்த்துகள்!
கவிஞர்/கவிதாயினி
கவிதை வடித்தக் கவிஞர் அனைவருக்கும் வாழ்த்துகள்!
இவண் பைந்தமிழ்ப்பூம்புனல்.
Subscribe to:
Comments (Atom)