பாதை வழியே

  

விதியின் வழியே 

படர்கின்ற பயணத்தில்/

விரிகின்றதே வாழ்வும் 

வியக்கின்றதே மனதும்/

கற்களும் முட்களும் 

காயங்களின் வலிகளும்/

பூக்களின் ஓசைக்குள் 

சப்தமிடுகின்றன மெலிதாக/

 

நகர்கின்ற தரிசனங்களில் 

பதிகின்ற சவால்கள்/

சிகரமென உயர்ந்தே 

சிந்தையதைத் துளைக்கையில்/

வருத்தத்துள் வீழ்ந்திடாமல் 

வலிமையோடு வென்றிட/

முயற்சியின் எழுச்சிக்குள் 

எழுகின்றேன் தன்னம்பிக்கையுடன்/

ஜன்ஸி கபூர் - 17.11.2020

-------------------------------------------------------------------------------- 

பாதை வழியே

---------------------------

பாதை வழியே நடக்கின்றேன் இதமாக/

பரவசத்தில் மனமும் பற்றுதே தரிசனங்களில்/

வீழ்கின்ற அருவி வெண்நுரை தூவி/

தென்றலில் கரைகையில் களிக்குதே மனமும்/

பச்சை விரிப்பில் பதுங்கும் புற்களில்/

இச்சையோடு முத்தமிடுகின்றன வெண்பனித் துளிகள்/

நீள்கின்ற பயணம் இரசிக்கின்றேன் ஒவ்வொன்றாய்/

மாறுகின்ற காட்சிபோல் வாழ்க்கையும் நிலையற்றதே/

அஸ்கா சதாத்  - 17.11.2020

 

 

 

நீயும் நானும்

அள்ளிச் செருகிய ஆசைகளோ விழிகளுக்குள்/

அன்பின் தித்திப்புக்குள் அடங்கினோம் சுகமாக/

அலைகளின் அணைப்புக்குள் தித்திக்கின்றதே காதலும்/

அன்பே சாய்கின்றேன் உன் மடியினில்/

மெலிதான பூங்காற்றாகி மேனி தழுவுகையில்/

அந்திச்சிவப்பும் மறைகின்றதே உன் வெட்கத்துக்குள்/

 ஜன்ஸி கபூர் - 19.11.2020

ஏதோ நினைவுகள்

 

உதிர்கின்ற ஒவ்வொரு நாட்களிலும் வீழுகின்றதே/

உணர்வுகளுடன் கலந்துவிட்ட இனிய நினைவுகள்/

பள்ளி நாட்களைப் பகிர்ந்த தோழமைகள்/

உள்ளத்தின் சேமிப்பினில் சுகமான சுவடுகள்தானே/

கண்ணீர் ஈரத்தினை ஒற்றியெடுக்கின்ற அன்பும்/

அடங்கிக் கிடந்த தருணங்களும் அழகானவை/

மனதைச் சுவைக்கின்ற ஒவ்வொரு நினைவுகளையும்/

தனிமைக்குள் திறந்தே உயிர்க்கின்றேன் தினமும்/

அஸ்கா சதாத் - 14.11.2020

தர்மம் தலை காக்கும்

 

முதுமையும் தாய்மையுமென முகங்காட்டும் யாசகங்கள்/

முகவரியாம் வறுமைக்குள் முக்காடிடும் அவலங்கள்/

இரந்திடும் கரங்களுக்குள் இரக்கமே உணவளிக்கும்/

இதயத்தில் அன்புள்ளோர் இன்னலைத் துடைத்திடுவார்/

ஏழ்மைத் தணலில் ஏக்கங்கள் புகைய/

ஏனிந்த விதியோ ஏற்றமில்லா வாழ்வுக்குள்/

ஏழை எளியோர் ஏந்தும் கரங்களுக்கு/

உதவிகள் செய்வோர் உயர்ந்தவர்களே என்றும்/

நவீனத் தேடலுக்குள் நகர்ந்திடும் உலகில்/

நடுங்கும் தேகங்கள் நடைபாதை ஓரங்களில்/

நாளும் பொழுதுமாக  நாடுவார் தர்மத்திற்காக/  

நல்மனங்களின் கருணையும் நற்செயலாகப் பூத்திடுமே/

ஈகையளிப்போர் என்றுமே  ஈடேற்றமே காண்பார்/

ஈருல மாண்பும்  ஈட்டிடுவார் சிறந்தே/

உயிர்களைப் பேணும்  உன்னதமாம் தர்மம்/

உம்மையும் என்னையும்  உயர்வாய்க் காத்திடுமே/

ஜன்ஸி கபூர் - 8.11.2020