ஆக்கமும் கேடும் அதனால் வருதலால்
காத்தோம்பல் சொல்லின்கண் சோர்வு
உதட்டின் வார்த்தைகளே உள்ளத்தின் கண்ணாடி
உரைத்திடும் நற்சொற்கள் நன்மையில் கூடிடுமே
வருந்திடுமே மனமும் நாசச் சொற்களால்
அருமையான வாழ்விற்கு விழிப்பான சொல்லாடல்
புண்படுத்தும் நெஞ்சினை பண்படுத்தும் நல்வார்த்தை
துண்டாடுமே மனதினையும் தீதான பேச்சொலியே
பண்பாடு காத்திடுமே சிந்தனை உரையாடல்
எண்ணம்போல் வாழ்ந்திடவே வேண்டுமே பயனுரைகள்
பேசும் ஆற்றலால் பெருமைகள் தேடி
பேணிடுவோம் நாவினை மகிழ்வும் கோடி
ஜன்ஸி கபூர்
விழுமியத்தின் விழுதுகள் தாங்கட்டும் பூமியை
அழுகையின் ஓசைகள் கரையட்டும் ஆழிக்குள்
எழுகின்ற அதிர்வுக்குள் அமைதி ஒலிக்கட்டும்
வாழுகின்ற வாழ்வினை நிம்மதியே ஆளட்டும்
ஒரே வானம் ஒன்றித்த பூமிக்குள்
ஒருங்கிசையும் சிந்தனைகளே ஏற்றத்தினுள் உயிர்க்கும்
வருங்காலம் சிறந்திடவே துறந்திடலாம் சுயநலத்தை
விரும்பிடுவார் யாவரும் அன்பின் வருடலை
பேதங்களும் வாதங்களும் முரண்பாடுகளாய் வெடிக்கையில்
பேரிடியாய் ஓலமிடும் இனவாதத்தின் அக்கினியே
சாந்தியில்லா நெறிமுறை அறுக்கும் தலைமுறைகளை
வெந்தணலில் அகத்தினையும் முழுதாகப் போர்த்திடுமே
வேதங்கள் மொழிவது மேன்மையான வாழ்வையே
வேதனைகளும் விரண்டோட மனிதமாக மாறிடலாம்
வேற்றுமையேது தரணியெல்லாம் எங்கள் தாயகமாம்
ஜன்ஸி கபூர் - 30.08.2020
நிலவைத் தொட்டுவிட ஏங்கும் கரங்களிலோ
இலக்கின் துடிப்பிருக்கு வெல்லுகின்ற ஆசையிருக்கு
துலங்கிடும் முயற்சிக்கு துணையும் அருகென்றால்
மலருமே இதயத்தினில் ஆகாயமும் வசப்படுமே
சிறு மலர்களின் எண்ண அசைவினில்
இறங்கிடுமோ பிறைக் கீற்றும் தரையினில்
உள்ளத்தின் ஊக்கத்திற்கு வெற்றியோ உச்சத்தில்
உயரமும் தாழ்ந்தே வாழ்த்திடுமே தன்னம்பிக்கையை
ஜன்ஸி கபூர்
ஏடெடுக்கா கரத்தினில் வன்மத்தின் ரேகைகள்/
ஏழ்மையின் ஏக்கத்துக்குள் எரிமலைப் பூக்கள்/
தோற்றுப்போன வாழ்வில் தொடாத வசந்தங்களும்/
பற்று வைத்ததோ பாலகன் வாழ்வினில்/
இனிமையான வாழ்வோ இரும்புத் திரைக்குள்/
தனிமைக்குள் தள்ளாடுதே அறியாத வயதும்/
கனிந்திட்ட மனதுக்குள் கறைகளே குற்றங்களாய்/
மனிதம் துறந்ததனால் மலராதே எதிர்காலமும்/
விழி நீருக்குள் வீழ்ந்திட்ட கனவெல்லாம்/
அழிகின்றனவே நெறி துறக்கும் வாழ்வினால்/
வழி தவறுகையில் சட்டம்தான் பிணைத்திடும்/
பழித்திடுமே வையகமும் பாதகங்களை நினைவுறுத்தியே/
பாசமில்லா மாந்தரும் வகுத்திட்ட விதியால்/
வாசனை அறியாத பூவோ வெயிலுக்குள்/
பழகிய நண்பரும் பழக்கிய பாதகங்களால்/
அழகிய வாழ்வும் சிதறுதே வெறுமையில்/
ஜன்ஸி கபூர்
